Il chor

Il Chor d’affons Sumvitg ei in chor cun 30 affons denter 9 e 16 onns e 30 denter 5 ed 8 onns, che han plascher da cantar. Auter che quei ch’il num lai supponer vegnan ils affons dallas vischnauncas da Sumvitg, Trun, Mustér, Tujetsch, Medel entohen da Laax. Il chor ei vegnius fundaus 1998 e quei per promover il plascher da cantar tiels affons. Dapi 2006 diregia Flavia Walder il chor e quei cun bien maun e sentiment. Sustegn ed agid survegn Flavia da Marina Bearth.

Ils puncts culminonts dil chor dils davos onns ein segiramein stai la presentaziun dil musical “Pamplona” en atgna reschia egl onn 2008, dil teater musical “BLING BLING” sut la reschia da Jürg Gautschi egl onn 2013, ils concerts annunals la primavera ni d’Advent sco era las fetg bialas presentaziuns a caschun dallas fiastas da cant. Seigi quei stau a caschun dalla fiasta da cant districtuala a Glion (2011) ed a Salouf (2014) ni era alla fiasta cantunala a Trun (2012). Plinavon ei la canunzun “il siemi” da Gion Balzer Casanova ch’il chor ha registrau cun igl ensemble Decanto vegnida giavischada il pli bia digl auditori da radio romontsch igl onn 2011 e 2012. Medemamein in’aventura tut speziala pil chor ein las representaziuns dil lungatg romontsch ell’entira Svizra seigi quei sur las undas da radio romontsch sco era l’emissiun da Nadal 2011 ch’ei vegnida emessa sin SF1.

Nus cantein cun c(h)or!

Il Chor d’affons Sumvitg vul, cun sia invitaziun da far part al chor, encuraschar tut ils affons e giuvenils che contan bugen, da cultivar e scolar lur vusch.

Nossa vusch ei in excellent instrument, il pli vegl instrument insumma. Entras il cantar el chor vegn la musicalitad dils affons e giuvenils promovida a moda zun varionta. Cantar en in chor arva numnadamein il mund musical cun sia grondiusa cultura. La finala ei era l’experientscha communabla da cantar en in chor, ina gronda valur.

Cul cantar el chor promovin nus ina correcta tecnica da flad e tun ed exercitein ina correcta posiziun dil tgierp. Vinavon fagein nus era moviments cul tgierp ed emprendin, ch’ina sauna vusch dat segirtad e fidonza en sesez.

Tut tenor vegliadetgna dat ei suandontas purschidas:

Cant per affons da 5-8: A moda termaglionta vegn empriu da cantar e da fladar.

Nus cantein, saltein ed improvisein culla vusch. Aschia emprendan ils affons da tedlar tier exact, tedlar in sin l’auter, gartegiar ils tuns e da seconcentrar.

Cuoz dallas emprovas: 50 minutas

Chor d’affons: Cun 9 onns vegnan ils affons el chor d’affons. Las habilitads vegnan sviluppadas vinavon. Ei vegn empriu in vast repertori che tonscha da canzuns tradiziunalas tochen modernas en ils pli differents lungatgs.

Cuoz dallas emprovas: 100 minutas

Ils chors exerciteschan separadamein. Silmeins ina gada per onn sepresentan ils chors communablamein.